bele idèje dël bale

Ancheuj mi i l'hai dit për la sconda vira, con un deuit general, ch'a venta "piantéla" con certe discussion e certi argoment. E për la sconda vira a l'é stàit dime "ma con cola autorità?".

La prima vira a l'é stàit quand i l'hai dit ëd piantéla con le bale dla grafìa, chè la scritura a-i é e a va bin parèj.

La scond vira a l'é stàit ancheuj ch'i l'hai dit ëd piantéla con ste gavade dël padanèis, ch'a l'é na stòria bela ch'a fa piasì contéla, veusto ch'it la cont? E peui at la conto mai, përchè a l'é tuta bora politicanta, e as capiss ch'a ven malfé parlé an sla Padania tratant ch'as parla 'd lenghìstica.
...
Tutun a l'é pa che mi i dijo "piantèla" përchè mi im pijo n'"autorità"
...
"piantèla" a l'é mach na manera educà për dì che im n'ancago bele dess e im n'ancagrai për sempe, ch'i son contra lòn ch'i dije, e ch'a l'é méj ch'i steve a tranta mèter da mi se cole-lì a son vòste bele idèje dël bale.

A l'é pa ch'i dovoma esse tùit amis e mignin e democràtich.

S'i l'eve certe idèje, mia amicissia a l'é nen për voi.

A fonsion-a parèj, përchè për fé lòn ch'i fon mi i rusch, e 'l dì ch'iv saluto pi nen, a veul dì ch'i l'eve gavàme la tera da sota ij pe. E i l'eve da capì che lolì mi i lo seufro pa.

noé e giassé

Ancheuj la pipart dij parlant piemontèis a san nen ëd parlé na vera lenga, la resta a pensa che tant i soma panà, e na furfa strèita 'd dot as ambaron-a an ponta dn'atòl ant n'océan ch'as alva lest, e a la dësfend com un ch'a l'ha por ëd chicassìa ch'as ëvzin-a, e a dventa squasi alèrgich, talment alèrgich ch'as vasta le cianse daspërchiel, as gava la possibilità 'd fé certe maneuvre, al àussa 'd muraje, a parla pi nen con certa gent, e con d'àutra a taca avèj 'n fetiss tachiss e insan. Cost a l'é esse «minoritari» ant un mond ostil.

Noé

Soma sn'atòl an mes dl'océan ch'as alva.

 an toca ij pe, jë snoj, ël còl cost àiva.

Le barcamente a son tute partìe.

 e a l'han lassàne sì a nijé ant ël bleu.

j'ancioe, 'me j'àutri pess a noo spedìe

 e chi a cata d'ancal a noa dëgià.

Giassé

Noi i soma na giassera ch'as dëslija,

 che nòsta gent a còla tuta an mar

soma 'd cubet ëd giassa che ansissì

 podran arziste ancor un pòch ëd temp.

e com ël clima a cangia, i sentiroma

 che forse la fresc'aria as guerna ancor

ant na bornìa ch'a ten la sò tamprura:

 durvendla a jë vnirà a tuit l'anfreidor.